Sit hér...

...ein heima og nýt lífsins í tætlur. Einar í borginni á fundi, Ólöf Ósk á balli á Nasa (jebbs-hún er orðin stór, stelpan) og strákarnir úti. Þarf reyndar fljótlega að fara og finna þá...!

Var að vinna í gær og dag. Hlakka mikið til haustsins í vinnunni, ákveðnar hugmyndir í gangi sem vonandi geta orðið að veruleika. Alltaf gaman að bæta sig í því sem maður er að takast á við. Það eru örugglega ekki allir eins heppnir og ég, að vinna við draumavinnuna sína - held reyndar sko að ég hafi sagt ykkur það áður

Reyndar er eitt sem böggar mig og það er fyrr-umræddur sykur. Sykur fer illa í minn haus, ég fæ útlitsþráhyggju og eins og ég hef áður sagt þá verða 2 kg mjög auðveldlega að 20...jafnvel 200!! Á svona dögum er ég gjarnan 120 kg. Eða sko, það sé ég í speglinum og myndi ekki fyrir mitt litla líf þora á vigtina Þetta er bilun! 

Svo nú hef ég ekki borðað sykur í 2 daga. Er ekki búin að ákveða að taka hann alveg út, það kemur í ljós. En ég finn að hann truflar mig í hausnum, fyrir utan að fara illa í liðina og valda höfuðverk. Enda sagði ég um daginn að þetta væri bölvað eitur...amk fyrir mig

Held ég verði aldrei sócial-sykuræta...ekki frekar en Einar geti orðið sócialdrinker...!! En hver hefur sinn djöful að draga og minn er ekki verri en einhver annar sko

Að öðru. Þrátt fyrir elsku mína á vinnunni minni þá er ég orðin þreytt og farin að þrá að komast í sumarfrí...en það er langt í það, ekki fyrr en seinnhlutann í júlí. En það er fullt af spennandi verkefnum í vinnunni fram að því - og allskonar skemmtilegt í frítímanum líka (þá meina ég t.d. GOLF!!!) svo þetta verður eflaust fljótt að líða. Áður en ég get snúið mér við verður sumarfríið búið og alveg að koma jól!!! 

En ég hlakka til, hlakka til að eyða sumarfríinu með þeim sem ég elska mest; fjölskyldunni minni og það er gaman að hlakka til, það er stór hluti af gleðinni sko

Framundan er fótboltahelgi, stór fótboltahelgi hér á Skaganum; Norðurálsmótið hjá 7. flokk. Jóhannes er ofur-spenntur enda að fara að keppa! Mikil gleði. Vona samt að ég sé eingöngu óheillakráka fyrir meistaraflokk ÍA...

Jæja, ætla að fá drengina inn...síðasta æfing fyrir mót á morgun!!! 

Kveð ykkur með hamingjumola dagsins: 

Jákvæð hugsun og athöfn eru óvinir dapurleikans.

Einhverjir hafa lesið það á facebook...!

En ég sem sagt tók helgina með trompi...hvað golfið varðar! Ekki svo að skilja að það hafi gerst kraftaverk í getu minni...en það gerðist kraftaverk í löngun minni!! Ég, Einar og strákarnir fórum 9 holur á laugardagskvöldið og svo vaknaði ég á sunnudaginn með aðeins eina hugsun; "mig langar í golf"!!!!

Hver hefði trúað því að það myndi gerast?? Ekki ég!!! En eins og sagt er; skítur skeður  

Þarf varla að taka það fram að Einar er alsæll með frúnna sína

Annars er bara lítið um að vera, sumarið framundan lofar góðu. Bara langt þangað til við hjónin förum í sumarfrí. Þangað til púslum við svo börnin gangi ekki sjálfala
Ólöf Ósk er á fullu í vinnuskólanum, var víst úrvinda úr þreytu þegar hún kom heim og var sofnuð um kl 20 í gærkvöldi, og svaf til 7.30 í morgun! 

Jóhannes er í fótboltaskóla þessa viku, svo eru fótboltaæfingar 3x í viku og svo öll börnin á golfæfingum oft í viku Svo það er nóg að gera og engum ætti að leiðast.

En nú ætla ég að smella mér í hafragrautinn, gera eitthvað við Gilitrutt-hárinu mínu og kannski bara smella mér í kaffi eitthvert!! 

Kveð ykkur með hamingjumola dagsins:

Villigötur geta orðið að hamingjubraut, ef við aðeins gerum okkur grein fyrir að við erum villt.

Er kominn tími...

...á nýja færslu?? Veit ekki hvað skal segja...eða hvort ég hafi eitthvað að segja...!!

Mig langar samt að segja eitthvað. Eiginlega sakna ég þess þegar ég boggaði á fullu, hausinn fullur af allskonar til að deila með lesendum mínum...sem eru löngu búnir að gefast upp á skrifuðu orði frá mér

Facebook yfirtók bloggið, en þar segi ég samt fátt. Jú, ein setning á dag eða svo, sem þó segir oft meira en mörg orð.

Í morgun svaf ég til kl. 11, var þreytt eftir vinnutörn. Ég vinn í törnum, tek yfirleitt 4 vaktir á 3 dögum. Það hentar mér vel, þar sem ég keyri um 50 km í vinnu - gott að spara bæði tíma og bensín með þessu. Ég ELSKA vinnuna mína, finnst ég hafa endalaust að gefa þar og fæ líka endalaust tilbaka frá mínum skjólstæðingum. Svo ég fer alltaf ríkari heim.

En það sem var málið í dag, var að ég ætlaði mér út að labba langan göngutúr í góða veðrinu áður en börnin kæmu heim úr skólanum. Það sem hamlaði mér var hausverkur "dauðans"!!! Og ég tel mig vita ástæðuna fyrir þessum hausverk. SYKUR!!!
Ég hef lengi vitað að sykur er eitur fyrir mig og minn haus og hef oft bloggað um það hér áður fyrr.

Sykur kemur ýmsu af stað hjá mér. Sykur hefur orsakað verki í liðum hjá mér, þá aðallega í fingrum og hnjám. Svo fæ ég útlitsþráhyggju; "feituna og ljótuna" þegar ég borða sykur. Svo er það þessi gríðarlega mikli höfuðverkur, sem ég fæ líka. Veit ekki hvað er verst; liðverkir, þráhyggja (endalausar, stjórnlausar hugsanir) eða hausverkurinn?!!!!

Sennilega er best að láta staðarnumið í sykuráti og játa mig sigraða. Ég á mér reyndar þann draum að geta smakkað sykur við hátíðleg tækifæri og það á eftir að koma í ljós hvort það takist.

Mér tókst amk ekki að verða "sócial-reykingamanneskja" og hætti þess vegna alveg að reykja. Tíminn verður að leiða í ljós hvort ég geti verið "sócial-sykuræta"

Jæja, ætla að klára að gera tossalista fyrir innkaup mánaðarins...út frá matseðli mánaðarins!!

Kveð ykkur með hamingjumola dagsins:

Enginn gerir betur en sitt besta - það dugar ekki alltaf til en er aldrei tilefni til iðrunar.

Kaldar tær og úfið hár

Hér sit ég, við eldhúsborðið, með ískaldar tær og úfið hár - búin að borða hafragraut og nenni ekki að standa upp til að búa mér til kaffi...geri það samt bráðum!!

Ég svaf til 10, var að vinna kvöldvakt í fyrrakvöld og svaf heima hjá tengdó - svaf illa. Það var fullt af hljóðum í húsinu sem ég er ekki vön. Venjulega sef ég þau af mér, en það er þegar hún er heima líka og ég á alveg eins von á hljóðum.
Fór svo að vinna í gærmorgun, og var svo áfram kvöldvaktina þar sem það voru veikindi. Kvöldvakt í kvöld svo smá frí.

Í dag verður mér örugglega ekki mjög mikið úr verki, en ætla þó að ná að þvo, helst að taka næsta skref með peysuna á Maríu sys...ganga frá endum og sauma og klippa :) Svo á ég bara eftir að hekla lista og festa tölurnar á - reyndar á ég eftir að finna tölur fyrst! Vona bara að þær fáist hér á Skaganum!

Strákarnir eru í golfi, þessir tveir yngri á æfingu og þessi elsti á golfmóti. Einhver miðvikudagsmótaröð í klúbbnum. Svo ætla þeir sko 9 holur! Þannig að ég sé þá ekki mikið í dag...þeir í golfi meðan ég er heima svo fer ég að vinna og þeir koma heim...!! 

Ólöf Ósk kemur heim á morgun!! Mikið hlakka ég til. Hún hins vegar myndi alveg vilja vera lengur, eftir því sem mér heyrist á henni. En kannski bara seinna... Hún fer væntanlega aftur út í lok apríl á næsta ári, en þá fermist Cille. Við eigum svo von á að Cille komi um áramótin til okkar :)

Jæja, ætli ég hendi mér ekki í sturtu svo Gilitrutt verði ekki hrædd ef hún skyldi mæta mér á götu...

Held ég fari í klippingu í fyrramálið!!!!

Hamingjumoli dagsins:

"Tími sem þú nýtur að eyða í ekki neitt, er ekki eytt til einskis."

- úr bókinni "En dag ad gangen i Al-Anon - Mod til forandring"

Loðinn haus og fleira

Jæja, þá er ég almennilega vöknuð og búin að ná áttum eftir næturvaktirnar þrjár. Shit hvað ég verð rugluð í dögunum. Vissi varla hvað sneri upp og hvað sneri niður. En svo er þetta fljótt að koma um leið og ég sef heila nótt

Er með hárið út í loftið...held Gilitrutt myndi jafnvel fá minnimáttarkennd...!!! Svo loðinn og úfinn er hausinn á mér! Það fyrsta sem ég geri um mánaðarmótin er að fara í klippingu!!!

Svo er það áframhaldandi vaktatörn, kvöldvakt í kvöld, morgunvakt á morgun og svo tvöföld á miðvikudaginn og svo frí aftur. Mér finnst ég reyndar alltaf vera í fríi þrátt fyrir að vera í 80% vinnu! Svo er auðvitað líka málið að mér finnst svo gaman í vinnunni svo þá verður þetta allt svo yndislegt

Ólöf Ósk kemur heim á fimmtudagskvöldið, sem er bara æði. Hlakka mikið til að fá hana heim...þó ég hlakki ekki beint til rifrildanna milli hennar og Jóns Ingva...en það hlýtur að eldast af þeim fyrir rest. Það að minnsta kosti eltist af mér og mínum systkinum...og vorum við þó slæm. Ótrúlegt að mamma og Jón Þór hafi ekki orðið crazy af öllu sem gekk á milli okkar systkinanna...!!! 

En það var með okkur, eins og Ólöfu Ósk og Jón Ingva; stundum lék allt í lyndi en svo sauð hressilega upp úr á milli

Hamingjumolinn:

"Líttu á hamingjuna sem eins konar andlega garðyrkju." 

- úr bókinni Þúsund hamingju spor

Ekki eins góður svefn...

...í dag og í gær. Í gær svaf ég frá 9.30-17.42! Ég hrökk við þegar ég leit á klukkuna, nokkuð viss um að hún væri kannski hálf þrjú...en nei. Ég þurfti að hendast á fætur til að ná í búð fyrir kl. 18, því mig vantaði smá meiri lopa fyrir peysuna handa Maríu sys.

Er langt komin með hana, María (ef þú lest...)!!

--

Næturvaktir eru EKKI my cup of tea!! Bara svo það sé á hreinu. En ég skemmti mér nú samt ágætlega. Þeir eru skemmtilega ruglaðir, strákarnir sem ég er að vinna með þessar 3 nætur. 

En í dag vaknaði ég rúmlega eitt...og er óttalega tussuleg...á góðri íslensku...! Legg mig ábyggilega á eftir.

Einar er farinn á golfmót, Jón Ingvi er hér með mér og Jóhannes er hjá Birni Viktori - stórvini sínum og frænda. Gott að eiga góðan vin. Þeir eru svo yndislegir, ótrúlega líkar týpur sem báðir hafa brennandi áhuga á golfi og fótbolta! Glókollarnir tveir.

--

Ég er ósköp andlaus...verð kannski í meira bloggstuði þegar þessari næturvaktatörn er lokið...

En hamingjumoli dagsins er þessi:

"Sem börnum er okkur sagt að það sé gott að sitja kyrr og vera stilltur, en vont að hlaupa um og hlæja hátt. Trúðu hinu gagnstæða."

- úr bókinni Þúsund hamingju spor

Næturvaktardrulla og fleira gaman :)

2. í golfnámskeiði í kvöld. Nú var "tjippað" og baksveiflan æfð, um daginn var það púttið og sveiflan - bara stutt sko Bara gaman sko.

Með mér á námskeiðinu er önnur kona, og hún er þarna af sömu ástæðu og ég; að læra golf svo hún sjái fjölskylduna sína meira!!
Þetta er greinilega útbreytt *vandamál*

---

Annars fórum við í sveitina í dag, fórum upp á Jarðlangsstaði í Borgarfirði þar sem amma Einars býr. Alltaf jafn yndislegt að koma til hennar. Þar voru fleiri er okkur bar að garði, frændi Einars með sína tvo stráka - sem eru mikið í sveitinni og því heimavanir. Sá yngri er jafngamall Jóhannesi og sýndi hann frændum sínum *konungríki* sitt, þeim öllum til ánægju og yndisauka.
Jón Ingvi vill flytja í sveitina!!!  Ekkert öðruvísi - takk fyrir kærlega.

Reyndar erum við Einar óttalegir durgar í okkur og myndum una okkur vel í sveit. Svo drengurinn hefur ekki langt að sækja þennan draum. 

Áður en við fluttum heim frá Danmörku dreymdi okkur um að setjast að í sveit á Íslandi, þegar heim kæmi. Vorum með ýmsar hugmyndir sem við hefðum glöð viljað koma í framkvæmd. En það varð ekki, en hver veit...enginn veit sína ævina fyrr en öll er

---

Svo á morgun er lítið um plön, annað en skottúr í borgina, svo er síðasti tími á námskeiðinu annað kvöld og svoooo....sumarfríið mitt er búið - blendnar tilfinningar. Annað kvöld byrja ég á næturvakt, verð á næturvöktum næstu 3 nætur...ef ALDREI tekið 3 næturvaktir í röð svo ég er dálítið smeik...

...málið er að eftir 1. næturvaktina fæ ég drullu og á 2. næturvaktinni er ég með brjálaðan kláða um allan líkama...en hvað skyldi gerast á þeirri 3.??!!!!

Ég man eftir þessm kláða *í gamla daga*, þegar ég var á fullu í djamminu með Bakkusi gamla...en ég tengdi kláðann einmitt við Bakkus. En nú er ég amk búin að komast að því að það er frekar óreglulegur svefn - eða næturvökur sem gefa mér kláða.

Nóg um það. Bara hamingjumoli í lokinn:

"Gættu þess að enginn verði til þess að bregða fyrir þig fæti, er þú skundar til móts við hamingjuna."

- úr bókinni Þúsund hamingju spor 

Lífið er dásó :)

Við erum svo heppin að fá að hafa minn yndislega stjúpa hjá okkur þessa viku. Reyndar ekki af góðu tilkomið þar sem hann er allur út á hlið vegna bakverkja, svo hann er að sækja hjálp hjá hnykkjara. En samt, við græðum fullt af gæðatíma með honum og erum alsæl með það

Í gær sóttum ég og Jóhannes hann og í dag fórum við þrjú; ég, Jón Þór (stjúpinn minn yndislegi) og Jón Ingvi (handarbrotna yndið mitt) í borgina. Jóhannes fór til vinar síns, en Einar í golf. Við erum búin að spóka okkur um borgina í nokkra tíma, setjast á kaffihús x2 og hafa það náðugt. Bara næs.

Jón Þór er reyndar á því að við höfum byggst hús á vitlausum landshluta! Hann hefði viljað sjá okkur á austfjörðum - allra helst heima á Nobbó!

Hamingjumoli dagsins:

"Sjálfþekking er upphafið á hugarró."

- úr bókinni Þúsund hamingju spor 

Golf og fleira

Ég smellti mér á golfnámskeið í kvöld. Fyrsti tíminn í kvöld, í allt 3 skipti. Mjög gaman. Gekk vel :) Ég ætla að gefa golfinu tækifæri - og sjálfri mér um leið. Mér var farið að finnast þetta golf hálfglatað...gekk ekkert og nennti þessu bara ekki. Þrátt fyrir að minn heittelskaði væri sífellt að segja mér að það yrði enginn Tiger Woods á einni nóttu...kappinn sá byrjaði að æfa 2ja ára gamall sko!!!

En ég er búin að sálgreina sjálfa mig og komast að því hvað veldur...eða hvað ég tel líklegt að sé málið:

GAMALL ÓTTI!!!! Minn versti djö....!! 

Mig langaði alltaf *í gamla daga* að æfa íþróttir, sérstaklega þó blak. Mér fannst gaman í blaki í skóla, var alveg þokkaleg, að ég held (tel mér amk trú um það). En ég þorði ekki að æfa því ég var svo hrædd við álit annara, hrædd við að vera ekki nógu góð, skíthrædd við stelpurnar sem voru að æfa blak og myndu örugglega ekki vilja hafa mig með og myndu örugglega hlæja að mér - hvað ég væri geðveikt léleg sko! 

Svo ég fór aldrei þessa leið. Neibb, ég valdi mér aðrar leiðir og Bakkus var ágætis félagi um stund. Eða þar til hans nærveru var ekki óskað lengur ;) 

En svo við snúum okkur að máli málanna, hvað kemur þetta golfinu við?!!! Júbb, ég er búin að komast að því að ég ætlaði bara að afgreiða golfið sem leiðinlegt! Því þá þyrfti ég ekki að takast á við þennan gamla ótta minn, að vera ekki nógu góð og hvað öðrum finnist um mig.

Og vitiði?!!! 

Ég má vera léleg, ég má vera byrjandi, ég þarf EKKI að vera heimsmeistari strax á 3ja degi!!! 

Svo nú ætla ég að gefa golfinu séns, og sjálfri mér. Staðráðin í að verðlauna sjálfa mig með silfurlituðum ECCO golfskóm eftir sumarið ef ég finn að mig LANGAR að halda áfram!! 

Ég segi hér með fortíðardraugunum stríð á hendur!!!

----

Hamingjumoli dagsins:

"Það er ljós við enda ganganna", segir sá bjartsýni.
"Það hlýtur að vera lest sem stefnir beins á okkur", svarar hinn svartsýni.

- Úr bókinni Þúsund hamingju spor

Daginn í dag...og í gær :)

Gærdagurinn var mjög ljúfur. Þegar Einar og Jón Ingvi voru farnir áleiðis til Ólafsfjarðar dóluðum vég og Jóhannes okkur af stað til Reykjavíkur og heimsóttum Fjölskyldu- og húsdýragarðinn. Alveg einstaklega velheppnaður og góður dagur.

Mikið var ég glöð að eiga svona stóran strák. Er svooooo búin með smábarnakvótann! Við bara röltum um og ræddum málin, og ekkert vesen. Ég öfundaði amk ekki foreldrana sem voru með 1-3 ára háorgandi orma í sjálfstæðisbaráttu á handleggnum.
Þó það hafi verið ljúfur tími líka, þegar gormarnir okkar voru svona lítil þá er líka stórkostlegt að upplifa þau þroskast og stækka. Þetta er bara allt frábært, en allt á sinn tíma og smábarnatíminn okkar er liðinn.

--

Þegar við komum heim kom pabbi svo til að halda okkur selskap um helgina. Svo hér var rólegheitakvöld, það var tölvast, sjónvarpast og prjónað og spjallað og drukkið smá kaffi líka Bara notalegt  

Svo er enn einn sólríkur og fagur dagur hér á Skaganum í dag. Yndislegt alveg. Jóhannes er farinn út að hjóla, búinn að spila "Jesus Christ Superstar" í botni fyrir okkur, stórkostlegt alveg

Ég byrjaði að peysu á Maríu sys í gær, og verð að halda vel á spöðunum því hausinn minn er kominn í næsta...og þarnæsta...híhí... Sérlega frjór þessi haus minn...verst að vinnan byrjar í næstu viku og hún slítur svo í sundur prjónatímann... Nei, nei...ég hlakka til að mæta í vinnuna aftur, það er svo gaman þar. 

Jæja, ætla að sjá hvort ég geti ekki farið með stóla og prjónana út í sólina. Lífið er sannarlega ljúft

Hamingjumoli dagsins:

Hlustaðu á hvað börnin hafa að segja, því á sálarglugga þeirra ber engan skugga.

- Úr bókinni Þúsund hamingju spor