Loki...

...leikinn af Martin Bryggman í *Jul i Valhal*, jóladagatali DR jólin 2005.  Loki er göldróttur, eins og við vitum öll.  

Jón Ingvi elskar *Jul i Valhal* og hefur horft ansi oft á þessa þætti eftir að hann fékk þá í möndlugjöf síðustu jól.  Það sem Loki = Martin Bryggman gerir m.a. er að "galdra", hann lætur Jónas (önnur söguhetjan) hafa spýtu sem hann (Loki) var búinn að skera rúnir í, og Jónas setur þessa spýtu í vasann hjá pabba sínum...  Ástæðan fyrir þessu var að Jónas langar að það sé sjónvarp á heimilinu en pabbi hans hefur verið á móti því.  Pabbi Jónasar fer og kaupir sjónvarp.

Mamma Sofie (hin söguhetjan) er búin að fá vinnu í Singapor og þær mæðgur er að fara að flytja.  En Sofie vill ekki flytja - enn einu sinni.  Hún fær Loka (Martin Bryggman) í lið með sér...og viti menn, mamma Sofie skiptir um skoðun (enda orðin ástfangin af pabba Jónasar).

Er ég að gera ykkur rugluð?  Hér kemur *pointið*!!:

Hillerød í hádeginu:

Jón Ingvi: "Mamma, ég þarf að hitta Martin Bryggman."
Ég: "afhverju?"
Jón Ingvi: "Ég er með eina ósk sem ég þarf að fá hann til að hjálpa mér með.  Hann þarf að gera rúnaprik handa mér."
Ég: "Hvaða ósk er það?"
Jón Ingvi: "Að við flytjum aftur til Danmerkur."

Ááááá...sárt?  Já.  

Við ræddum þetta svolítið og ég spurði hann hvers vegna hann vildi flytja aftur til Danmerkur.  Svarið var einfalt; "Ég á miklu fleiri vini í Danmörku."

Söknuðurinn er ennþá mikill.  Það eina sem ég get gert er að knúsa hann og segja honum að ég skilji hann.  Ekki reyna að gera þetta gott með því að segja; "Þú átt eftir að eignast vini á Akranesi!".  Því það skiptir ekki máli núna.  Eins og er sársauki og söknuður og það verðum við að ganga í gegnum saman.  

Ég veit - eða vona - að þetta líður hjá með tímanum.  Þangað til ætla ég að veita honum allan þann styrk sem ég get og öll þau knús sem hann mun þurfa.  

Molinn minn litli...sem er samt svo stór. 

Athugasemdir

[Jóhanna (IP-tala skráð) 14.3.2007 kl. 23:07]

Ég fæ alveg í hjartað að lesa þetta og tár í augun. Það hefur verið miklu erfiðara en við bjuggumst við að flytja með okkar litla gutta en honum líður þó betur nú en áður. Svo er ég innst inni farin að kvíða því að rífa hann aftur upp, hvenær sem hann verður. Ég get þá allavega lært af ykkur hvernig þið höndlið hlutina . Vona bara að Jóni Ingva fari að líða betur á Skaganum og vinirnir fari að láta sjá sig.

[Steinunn Helga Sigurðardóttir, 15.3.2007 kl. 07:09]

Mér finnst þessir þættir líka alveg frábærir, við vorum límd við sjónvarpið í december í fyrra að fylgjast með. Martin Bryggman er líksa góður sem loki.

kveðja

steina 

[Salný (IP-tala skráð) 15.3.2007 kl. 09:05]

úff hvað þetta hefur verið erfitt.... er alveg að fara að skæla eftir að hafa lesið þetta... Þykist vita að þið hjálpið stráknum í gegnum þennan erfiða aðlögunartíma.. já og svo væri nú gaman að fá einhvern tímann að sjá þessa margumræddu þætti... kærar kveðjur frá Nesk. Salný

[SigrúnSveitó, 15.3.2007 kl. 15:58]

Já, þetta er ekkert grín.

En Martin Bryggman er frábær!!!